Operasyon ng Wisdom Teeth: Ang Iyong Paggaling       

Ang proseso ng paggaling

Tumatagal ng ilang buwan ang paggaling pagkatapos na bunutin ang wisdom teeth. Una, nabubuo ang dugo sa socket kung saan tinanggal ang wisdom tooth. Kailangan nitong pamumuo ng dugo na manatili sa lugar upang protektahan ang buto at mga nerbiyo. Sa loob ng isa o 2 araw, nagsisimula ang socket na magpuno ng mga repair tissue. Inilalatag nito ang pundasyon para tumubo ang bagong tisyu ng buto. Kapag pinunan ng bagong tisyu ng buto ang socket, tapos na ang paggaling.

Pagkatapos ng ilang oras ng operasyon, may namumuong dugo na pumupuno sa socket.

Halos 3 linggo pagkatapos ng operasyon, napuno ng napanumbalik na tisyu ang socket.

Pagkatapos ng operasyon

Sa unang 1 hanggang 2 araw pagkatapos ng operasyon:

• Kontrolin ang pagdurugo. Kumagat sa gasa na nasa lugar na binunutan. Gumamit ng patuloy na presyon. Dapat huminto ang pagdurugo sa loob ng 2 oras. (Normal ang ilang pagtagas ng dugo sa ilang araw.)

• Uminom ng gamot ayon sa itinagubilin. Maaaring magreseta ang iyong siruhano ng gamot sa kirot o maaaring magmungkahi na gumamit ng gamot na nabibili nang walang reseta sa halip. Maaari ding resetahan ka ng mga antibayotiko upang maiwasan ang impeksyon.

• Bawasan ang pamamaga. Dampian ng ice pack ang iyong pisngi sa loob ng 10 minuto sa bawat pagkakataon. Magpahinga ng hindi bababa sa 5 minuto sa pagitan ng mga pagdampi. Upang makagawa ng ice pack, maglagay ng mga piraso ng yelo sa isang plastic bag na naisasara sa ibabaw nito. Ibalot ang bag sa isang malinis at manipis na tuwalya o tela. Huwag kailanman ilagay ang yelo o isang ice pack nang direkta sa balat.

• Huwag uminom ng maiinit na likido. Maaaring palubhain ng init ang pamamaga o pagdurugo.

• Magkaroon ng sapat na pahinga. Magrelaks sa loob ng hindi bababa sa 24 oras matapos ang operasyon. At matulog nang maaga.

• Uminom ng masusustansyang likido. Sa sandaling huminto na ang pagdurugo, subukang uminom ng katas ng gulay, 100% katas ng prutas, mga inuming protina, o gatas.

• Ingatan ang lugar na binunutan ng ngipin. Upang maiwasang maaalis ang namuuong dugo, huwag magsipilyo ng iyong mga ngipin o banlawan ang iyong bibig sa unang araw. Huwag manigarilyo o uminom gamit ang straw. Maaaring maalis ng pagsipsip ang namuong dugo.

Pagtulong sa iyong bibig na gumaling

• Bumalik nang dahan-dahan sa iyong normal na diyeta. Magsimula sa malalambot na mga pagkain gaya ng oatmeal, mga saging o minasang patatas. Maaari mong katasin ang mga prutas at gulay sa isang blender. Maaari kang kumain ng matigas na pagkain kapag kaya mo na.

• Sipilyuhin at i-floss ang iyong mga ngipin nang dahan-dahan. Maghintay ng isang araw pagkatapos ng operasyon. Pagkatapos, mag-ingat kapag nililinis ang palibot ng lugar na naghihilom.

• Panatilihing malinis ang lugar na binunutan. Simula sa araw matapos ang operasyon, banlawan ang iyong bibig pagkatapos ng bawat pagkain sa loob ng halos isang linggo. Gumamit ng antiseptic ayon sa itinagubilin o gumawa ng pinaghalong 1 tasa ng maligamgam na tubig at ½ kutsaritang asin.

Mga bagay na dapat iwasan

• Huwag magmaneho habang umiinom ka ng iniresetang gamot para sa kirot.

• Huwag uminom ng alkohol hangga't umiinom ka ng gamot para sa kirot.

• Huwag manigarilyo sa loob ng hindi bababa sa isang linggo pagkatapos ng operasyon. Nagbibigay-daan ito sa mas mabilis na paggaling. Mas mabuti kung mas matagal kang mananatiling hindi naninigarilyo. Pinakamabuti sa lahat ang paghinto nang permanente.

• Huwag kumain ng malulutong o malalagkit na pagkain sa loob ng hindi bababa sa 2 linggo. Kabilang dito ang mga pagkain gaya ng popcorn o caramel. At, huwag uminom ng malalapot na likido (gaya ng milk shake) sa pamamagitan ng straw.

• Huwag magmumog nang puspusan sa unang 24 na oras. Maaari mong maalis ang namuong dugo.

Kailan dapat tumawag sa iyong tagapangalaga ng kalusugan

Tumawag kaagad sa tagapangalaga ng iyong kalusugan kung alinman sa mga sumusunod ang mangyari:

• Lumulubha ang kirot sa araw pagkatapos ng operasyon o hindi makontrol ng gamot para sa kirot.

• Mahirap kontrolin ang pagdurugo o pumupulandit ang dugo.

• Giniginaw ka.

• May lagnat ka na 100.4ºF (38ºC) o mas mataas, o ayon sa itinagubilin ng iyong tagapangalaga ng kalusugan.

• Lumulubha ang pamamaga sa paligid ng lugar na binunutan.

• Mayroon kang pangangati, pantal, o iba pang sintomas na maaaring dulot ng reaksyon sa allergy sa iyong gamot.

• Mayroon kang paulit-ulit na pagkahilo o pagsusuka.